HARAGIRIMANA Dieudonne
Rwangabo Leonard utuye mu Mudugudu wa Gisa, Akagari ka Gisa mu Murenge wa Rugerero mu Karere ka Rubavu, yavuze ko yibwe ihene zirindwi mu icumi yari atunze, yaje gutabaza abaturage bamufasha gushakisha baza kuzisanga mu rugo rw’umuturage utuye mu wundi Mudugudu wa Rusongati yamaze kubaga 6.
Mu rugo rw’uyu mugore niho abaturage basanze izo hene zamaze kubagwa
Rwangabo yabwiye UMUSEKE dukesha iyi nkuru ko izi hene yazibwe mu masaha y’ijoro ryo ku wa Gatatu rishyira ku wa Kane, mu gitondo cyo ku wa Kane tariki 18 Ugushyingo, 2021 nibwo yatabaje ko yibwe ihene 7 nijoro.
Ako kanya bahise batangira gushakisha, abaturage dusanga izo hene zabagiwe mu Mudugudu wa Rusongati, mu rugo rw’umugore witwa UMUHOZA Oliva w’imyaka 21.
Mu rugo zabagiwemo basanze harimo abagore batatu, UWAMAHORO Falida w’imyaka 25, atuye mu Mudugudu wa Cyanika, BYAMUNGU Saidath utuye mu Mudugudu wa Gisa, na MUDATEBA Media utuye mu Mudugudu wa Cyanika.
Aba bagore bose bakekwaho gufatanya kwiba ziriya hene no kuzibaga, bajyanwe kuri RIB sitasiyo ya Rugerero.
