Epaphrodite Nsengimana
Ikipe ya Rayon Sports izahagararira u Rwanda muri CAF Confederation Cup, iheruka kubona insinzi ubwo yatsindaga APR Fc ku mukino wa nyuma w’igikombe cy’Amahoro byaje no kurangira icyegukanye.
Wari umukino wabaye tariki 3 Kamena 2023, ubera kuri sitade ya Huye, waje kurangira Rayon Sports itsinze APR Fc igitego 1-0.
Kuva icyo gihe, iyi kipe yahise itakaza umutoza Haringingo Francis wayitozaga ndetse na rutahizamu Leander Willy Essombe Onana wayitsindiye ibitego byinshi.
Murera yazanye umutoza mushya, Yamen Zelfani ndetse igura n’abandi bakinnyi, gusa kuva baza muri iyi kipe nta mukino numwe baratsinda mu mikino 3 yose bakinnye ya gishuti.
Rayon Sports yatangiye ikina na Vital’O FC yo mu Burundi, binganyiriza i Nyamirambo ibitego 2-2, Murera yakurikijeho Gorilla Fc maze nazo zinganya 1-1, ku munsi w’Igikundiro noneho Rayon Sports yatsinzwe na Kenya Police Fc igitego 1-0.
