Pep Guardiola n’abasore be bahaye ubutumwa Arsenal ko idacunze neza yazabura byose nk’ingata imennye

Ikipe ya Manchester City yahaye ubutumwa ikipe ya Arsenal bitegura gucakirana ku wa gatatu ko bishobora kutazayorohera.
Manchester City ku munsi w’ejo hashize yakinaga n’ikipe ya Aston Villa, maze Manchester City iyitsinda ibitego bitatu kuri kimwe mu mukino w’umunsi wa 23 wa Premier League.
Manchester City yaje gukina uwo mukino ibizi neza ko yamaze gutakaza umwanya wa kabiri ku rutonde rw’agateganyo kuko ubwo wari wicaweho n’ikipe ya Manchester United.

Manchester City n’ayo ntiyugeze izuyaza mu gushaka intsinzi kuko iminota y’igice cya mbere yarangiye Pep n’abasore be bamazs kubona intsinzi y’ibitego bitatu byatsinzwe na Rodrigo ku munota wa kane w’umukino , Ilkay Gondogan ku munota wa 39 ashyiramo icya kabiri maze ku munota wa 46 Riyad Mahrez atsinda icya gatatu. Mu gihe igitego kimwe cya Aston Villa cyatsinzwe na Ollie Watkins ku munota wa 61.

Gutsinda kwa Manchester City byatumye ihita yegera ikipe ya Arsenal ku rutonde rw’agateganyo. Ubu Manchester City ifite amanota 48 mu gihe Arsenal ya mbere ifite 51 bivuze ko mu gihe Manchester City yatsinda Arsenal kuwa Gatatu hazasigaramo ikinyuranyo cy’inota rimwe.