Ntibisanzwe:Umugore yabyaye abana icyenda icyarimwe.

Umugore ukomoka mu gihugu cya Mali yaraye abyaye abana icyenda bose, kimwe mu bintu by’imbonekarimwe.

Halima Cissé w’imyaka 25 yabyaye ejo ku wa kabiri abakobwa batanu n’abahungu bane mu bitaro byo muri Maroc aho yari asanzwe arwarijwe, nk’uko bivugwa na Ministiri wo muri Mali ashinzwe ubuzima, Fanta Siby.

Bivugwa ko uyu mugore yacishijwe mu cyuma (echograph) maze batangaza ko azabyara abana barindwi gusa ntibabona abandi babiri.

Ejo ku wa kabiri, Muganga Siby yavuze ko izi mpinja na nyina wabo “bameze neza”. Ariko ngo bazasubira mu rugo nyuma y’ibyumweru byinshi kuko bakitabwaho n’abaganga.

Reuters ivuga ko uyu mugore yatunguye abatari bake, kuko ntibisanzwe ko umuntu atwita abana icyenda icyarimwe.