THIERRY Mugiraneza
Noam Emeran umukinnyi ukinira ikipe ya Manchester United y’abato akaba yifuzwa kuzakinira ikipe y’igihugu Amavubi ubu ahatanye n’abarimo Marcus Rashford kuzareba uwatsinze igitego kiza mu ikipe ya Manchester United ibyiciro byose.
Noam, umuhungu wa Nkusi Flitz Emeran wakiniye Amavubi, ni umukinnyi wa Manchester United wifashishwa cyane mu ikipe y’abatarengeje imyaka 21 nubwo yanditswe no mu bemerewe gukinira ikipe nkuru.
Igitego yatsinze kuwa 27 Mutarama ubwo Manchester United y’abatarengeje imyaka 21 yakinaga na Blackburn Rovers U21, cyashyizwe mu bizatoranywamo igitego cyiza cy’ukwezi muri Manchester United, ahatoranywa igitego cyiza mu bo mu byiciro byose.
Igitego cya Noam gihatanye n’ibindi birimo icyatsinzwe na Luke Shaw mu mukino wahuje Manchester United na Bournemouth, icyatsinzwe na Fred bakina na Reading n’icyo Antony yatsinze Chalton Atletics muri Carabao Cup.
Hari kandi ibitego Marcus Rashford yatsinze Arsenal na Manchester City ndetse n’ibyo muri Manchester United y’abagore byatsinzwe na Martha Thomas ndetse na Rachel Williams mu bihe bitandukanye.
