Epaphrodite Nsengimana
Mu mukino wahuje Kiyovu Sports na Gasogi United bikaza kurangira Kiyovu Sports itsinzwe ibitego 3-1, umuyobozi wa Kiyovu Sports Mvukiyehe Juvenal yavuze ko umutoza agomba kumenya ko baba bashyizemo amafaranga yabo adakwiye kuvanga ibintu.
Yagize ati “Hari abantu tuba twashoyemo amafaranga yacu. Hari imyanzuro namubwiye ko kuva uyu munsi atongera gutoza ahagarara, ibindi akaza ku kazi tukamubwira imyanzuro twamufatiye.”
Aho niho umwuka mubi waje kuzamura biza gutuma ubuyobizi bwa Kiyovu Sports bukora inama y’igitaraganya, yarimo n’uyu mutoza mukuru Alain-Andre Landeut.
Nyuma y’iyi nama Juvenal yagiranye ikiganiro na televiziyo ya Kiyovu Sports yisegura ku bakunzi bayo, avuga ko ibyabaye byose yabitewe n’umujinya.
Yagize ati ” Kuva ku Cyumweru twatsindwa na Gasogi United habaye ibintu byinshi ndetse harimo n’ibyatewe n’uburakari, ubwo twavugaga ko umutoza agomba kuza ku kazi agahabwa ibaruwa yo kumuhagarika, ariko ibyo byose twabitewe n’umujinya ndetse n’umusaruro twari dukuye mu mukino.”
