simeon
Abahanzi b’abanyarwanda Meddy na Butera Knowless batashye amaboko masa mu bihembo bya African Entertainment Awards USA [AEAUSA], bitangirwa muri Leta Zunze Ubumwe za Amerika.
Ni ibihembo ngarukamwaka bitangwa kuva mu mwaka wa 2015;kuri iyi nshuro muri uyu mwaka byatanzwe taliki 26 Ukuboza 2021 hifashishijwe ikoranabuhanga.
Abahanzi batandukanye muri Afurika y’Iburasirazuba bari bahatanye mu byiciro by’ibi bihembo biri mu bikomeye bihabwa ab’indashyikirwa mu myidagaduro cyane mu muziki.
Indirimbo ya Meddy aheruka guhimbira umugore we Mimi Mehfira yise ‘Queen of Sheba’ yari ihatanye mu cyiciro cy’indirimbo nziza y’umwaka.
Muri iki cyiciro indirimbo iyatsinze ni ‘Essence’ ya Wizkid na Tems.
Butera Knowless yari ahatanye mu cyiciro cy’umuhanzikazi wo muri Afurika y’Iburasirazuba, Amajyaruguru n’Amajyepfo mwiza.
Muri iki cyiciro Umunya-Uganda, Spice Diana ni we wegukanye igihembo.
Abandi begukanye ibihembo muri AEAUSA harimo Diamond Platnumz wabaye umuhanzi w’umwaka, Don Jazzzy wabaye uvuga rikijyana w’umwaka, Patoranking wabaye umuhanzi uririmba Dancehall mwiza w’umwaka n’abandi.
Ni ibihembo byayobowe na Nancy Isime wo muri Nigeria n’Umunyarwenya w’Umunya-Tanzania Idris Sultan.
Ibihembo bya African Entertainment Awards USA bitangwa ku bahanzi bo muri Afurika bakoze neza kurusha abandi n’abari mu ruhando rw’imyidagaduro, hakarebwa ibyiciro bitandukanye no hanze ya Afurika.
