Iyo bamaze kunywa ibiyobyabwenge barenzaho gusambana, imyitwarire ya bamwe mu banyeshuri bo muri Gasabo yabaye ibindi bindi

Iyo bamaze kunywa ibiyobyabwenge barenzaho gusambana, imyitwarire ya bamwe mu banyeshuri bo muri Gasabo yabaye ibindi bindi.

Mu Kagari ka kagugu mu murenge wa Kinyinya haravugwa imyitwarire idahwitse ya bamwe mu banyeshuri bigize intakoreka.

Ababyeyi bahaturiye, babwiye RADIOTV10 dukesha iyi nkuru ko abanyeshuri biga mu bigo by’amashuri byegereye aka gace, bakunze kuhaza kuhanywera ibiyobyabwenge birimo n’itabi ry’urumogi ndetse n’inzoga.

Aba babyeyi bavuga kandi ko ikibabaje ari uko aba banyeshuri baba barimo ab’ibitsina byombi ku buryo iyo bamaze kunywa ibyo biyobyabwenge barenzaho gusambana.

Umwe mu babyeyi udasiba kubona amabi bakora yagize ati “Barasambana, bararwana, hari n’abo batahana babateruye rwose bakabajyana iwabo.”

Aba baturage bavuga ko niba ibigo by’amashuri bigamo byarananiwe guca kuri aba bana izi ngeso mbi, inzego z’umutekano zari zikwiye kugira icyo zikora, zikaba zashyira uburinzi aha hakorerwa izi ngeso mbi.