Inkuru itari nziza ku ikipe ya Manchester United nyuma y’ibyo abakinnyi bayo bakoze mu kibuga

Ikipe ya Manchester United yaciwe akayabo k’amafaranga £20.000 na FA, kubera imyitwarire itari myiza yaranze abakinnyi bayo ubwo batsindaga Brighton & Hove Albion mu ntangiriro z’uku kwezi.

Iyo myitwarire itari mwiza yagaragaye ku munota wa 53 w’umukino ubwo kapiteni wa Brighton, Lewis Dunk yahabwaga ikarita y’umutuku nyuma yo kuvuna, Anthony Elanga.

Nyuma yo kuvuna Elanga, Lewis Dunk yabanje kwerekwa ikarita y’umuhondo n’umusifuzi Peter Bankes. Ibyo byatumye abakinnyi ba United basagarira umusifuzi kubera icyemezo yari amaze gufata.

Nyuma yo gusagarirwa n’abakinnyi ba Manchester United, umusifuzi w’umukino yahise ajya kureba videwo y’ukuntu byagenze, aza ahita yisubira ku cyemezo yari yafashe cyo gutanga ikarita y’umuhondo ahita atanga ikarita y’umutuku.

Umutoza wa Brighton & Hove Albion, Graham Potter, ntabwo yishimiye icyemezo cy’umusifuzi cyo kwivuguruza ku byo yari yakoze.

Ikipe ya Manchester United yahanwe kubera kwica itegeko rya FA nimero 20.1 rigenga imyitwarire mu kibuga mu marushanwa ya FA.