HARAGIRIMANA Dieudonne
Umuhanzikazi Butera Knowless yatunguye umuryango urimo umwana witwa Prince Ivan Kunda umukunda cyane maze ibyishimo biramusaga.
Nkuko amashusho dukesha KC2 abigaragaza, hari mu kiganiro THE MEET UP aho KC2 ifatanyije n’ubuyobozi bwa Kina Music bateguye gutungura Prince Ivan bakamuzanira Umuhanzikazi Prince yakunze kuva kera akaba yari ataramubona.
Mu gutangira ikiganiro, Prince yavuze ko yakuze akunda Knowless kuva akiri muto gusa akaba ataramubona ndetse guhura nawe yari yavuze ko ari inzozi kuri we.
Butera Knowless yaje kwinjira mu rugo iwabo wa Prince maze akinjira Prince aratungurwa cyane aramuhobera ndetse Mama wa Prince aha indabo Prince ngo azihe Knowless.
Prince yavuze ko yishimiye cyane guhura na Butera Knowless kuko inzozi ze zabaye impamo. Butera Knowless nawe yavuze ko yishimiye guhura n’umuryango wa Prince.
Arimo kuvuga ijambo rishimira umuryango wa Pronce, Butera Knowless yahindukiye maze akubita amaso ifoto y’inshuti ye ya Kera yitwa Huguette akaba ari na mushiki wa Prince witabye Imana. Butera Knowless amarangamutima yamusaze maze avuga ko Huguette yitabye Imana mu gihe Knowless atari ari mu Rwanda bityo ntiyatabara umuryango we. Yongeyeho ko Huguette yari inshuti ye ya hafi cyane dore ko baniganye ndetse yari n’umufana we ukomeye. Butera Knowless yashimishijwe no kuba ahuye n’umuryango wa Huguette avuga ko ari umugambi w’Imana.
