Social Mula
Umukinnyi wo hagati mu kibuga, Ishimwe Annicet yakerewe mu nama itegura umukino (Réunion technique) bituma umutoza Ben Moussa amuha igihano cyo kumubanza hanze y’ikibuga.
Ejo ku Cyumweru tariki 12 Gashyantare 2023, nibwo ikipe ya APR FC yatsinzwe na Rayon Sports igitego kimwe ku busa mu mukino w’umunsi wa 19 wa shampiyona y’Icyiciro cya Mbere umwaka w’imikino wa 2022-2023.
Kuva mu ntangiriro z’icyumweru gishize umutoza Ben Moussa yari yarapanze kuzabanza mu kibuga Ishimwe Annicet bitewe n’uko yari afite imbaraga nyinshi mu myitozo, gusa byaje guhinduka amubanza hanze y’ikibuga nyuma y’amakosa uyu mukinnyi yakoze bigatuma umutoza amurakarira.
Amakuru dukesha Radio Fine FM, ni uko ubwo ikipe ya APR FC yari igiye mu nama itegura umukino (Réunion technique) Ishimwe Annicet yahageze akerewe biza kurakaza umutoza Ben Moussa ahitamo kumubanza hanze y’ikibuga.
Ishimwe Annicet ni umwe mu bakinnyi bakunda kuzonga Rayon Sports, muri 2020 yayitsinze igitego cyo ku munota wa nyuma, ni nako mu mpera z’umwaka ushize nabwo yatanze umupira wavuyemo igitego cyatsinzwe na Bizimana Yannick.
