Hamenyekanye akayabo umutoza wa Rayon Sports yahawe kugira ngo yemere kwerekeza muri Gasogi United

Ku itariki 31 Ukwakira 2022 binyuze ku Mbuga-Nkoranyambaga zayo, ikipe ya Gasogi United yemeje ko yatandukanye n’abari abatoza bayo, Ahmed Adel na Bahaaeldin Ibrahim, ku bwumvikane bw’impande zombi.

Kuri ubu, iyi kipe y’umukara na Oranje yamaze kubona abatoza bashya bazayitoza mu gihe cy’amezi atatu, ashobora kuzongerwa bitewe n’uko bazayitwaramo.

Paul Kiwanuka ni we wahawe inshingano nk’umutoza mukuru, mu gihe azungirizwa na Dusenge Sasha.

Paul Kiwanuka yatoje amakipe atandukanye muri Uganda, arimo Bright Stars, Vipers yanyuzemo nk’umutoza wungirije ndetse na Busogo Fc yatozaga kuri ubu.

Dusenge Sasha umwungirije we yatoje muri Rayon Sports Fc nk’umutoza wungirije, mu gihe kuri ubu yari umutoza w’ikipe y’abagore ya Rayon Sports, bikaba bivugwa ko ikipe ya Gasogi United izajya imuhemba miliyoni y’Amanyarwanda buri kwezi.

Nyuma y’umunsi wa 7 wa Primus National League, Gasogi United iri ku mwanya wa 6 n’amanota 10, mu mikino 6 imaze gukina, kuko ifite umukino w’ikirarane na Marines FC. Kuri iki Cyumweru Gasogi United irerekeza i Rusizi mu mukino w’umunsi wa 8 wa shampiyona izakirwamo na Espoir FC.