Epaphrodite Nsengimana
Mu mukino wo kuri uyu wa Gatandatu tariki 13 Gicurasi 2023, wahuje ikipe ya Rayon Sports na Mukura VS, abafana b’iyi kipe yambara Ubururu n’Umweru, basabye imbabazi abakinnyi, nyuma y’imyitwarire bagaragaje ubwo iyi kipe yatsindwaga na Gorilla FC.
Ubwo umukino wa Gorilla FC na Rayon Sports warangiraga, abafana bayo banze gukomera amashyi abakinnyi babo ahubwo bayakomera aba Gorilla FC yari imaze kubatinda.
Mu mukino wabaye kuri uyu wa Gatandatu, ubwo wari ugeze hagati, abafana ba Rayon Sports bagaragaje ibyapa bisaba imbabazi, bagize bati “Basi Sorry”, umukino urangiye, abakinnyi bemereye gukomera amashyi abafana.
Uyu mukino warangiye ikipe zombi zinganyije igitego 1-1, bituma Rayon Sports ikomeza ku mukino wa nyuma w’igikombe cy’amahoro ku giteranyo k’ibitego 4-3 kubera ko mu mukino ubanza, Rayon Sports yari yatsinze Mukura VS ibitego 3-2.
