Geovanis
Ikipe y’Ingabo z’Igihugu, APR FC, ishobora gutera gapapu mukeba wayo, Rayon Sports, kuri rutahizamu w’Umunye-Congo Jean Marc Makusu Mundele kuri ubu udafite ikipe.
Makusu uheruka gutandukana na St Éloi Lupopo, kuri ubu ari kubarizwa muri Algeria aho ari kumwe n’Ikipe y’Igihugu ya Repubulika Iharanira Demokarasi ya Congo muri CHAN 2022.
Uyu mukinnyi w’imyaka 30, yari amaze iminsi avugwa muri Rayon Sports ariko impande zombi ntizirumvikana ku igurwa rye kuko ibyo asaba birimo umushahara w’ibihumbi 3$ ukiganirwaho.
Umwe mu bo hafi ya Makusu Mundele yabwiye IGIHE dukesha aya makuru ko ibiganiro hagati y’uyu mukinnyi na APR FC byatangiye muri iyi minsi ndetse bisa n’ibyafashe umurongo muzima ku buryo yumva yaza gukinira iyi kipe yambara umukara n’umweru.
Ibiganiro by’impande zombi birashimangira amakuru avuga ko APR FC ishobora gutangira gukinisha abanyamahanga mu mikino yo kwishyura ya Shampiyona mu gihe Ishyirahamwe ry’Umupira w’Amaguru mu Rwanda (FERWAFA) ryaba ryongereye abakinnyi amakipe yemerewe, bakaba 33 aho kuba 30 nk’uko bimeze muri uyu mwaka w’imikino.
