Social Mula
Al Ahly yegukanye igikombe kiruta ibindi ku mugabane w’Africa, CAF Super Cup, ku nshuro ya kabiri yikurikiranya itsinze Raja Casablanca kuri penaliti nyuma yo kunganya igitego 1-1 mu mukino wabereye muri Qatar.
Umukino wa nyuma wa CAF Super Cup uhuza ikipe yatwaye CAF Champions League na CAF Confederation Cup.
Raja Casablanca ikomoka mu gihugu cya Maroc yari yizeye ko ishobora kwegukana iki gikombe nyuma yo kubona igitego ku munota wa 13 w’umukino, ariko igitego cya Taher Mohamed cyo mu minota ya nyuma y’umukino cyohereje uyu mukino muri penaliti.
Ni umukino waranzwe no gusatira izamu cyane kwa Al Ahly, mu gihe Raja Casablanca yo yugariraga igacungira kuri countre-attacks kugira ngo ikomeze kurinda igitego yari yabonye hakiri kare.
Abdelilah Hafidi yatanze umupira mwiza ukanyura kuri ba myugariro ba Al Ahly ukagera kuri Madkour wahise undira umupira mwiza imbere y’izamu ni uko Hamid Ahadad agafungura amazamu ku ruhande rwa Raja Casablanca.
Ku munota wa 90 w’umukino, Al Ahly yaje kwishyura igitego yuma y’akazi yuko Zniti akuyemo umupira wa Mohamed Afsha, ariko Percy Tau agakora akazi gakomeye byafashije Taher kwishyura igitego ku ruhande rwiyi kipe yo muri Egypt.
Umukino warangiye amakipe yombi anganya ajya muri penaliti zaterewe ku izamu ryari hafi y’abafana ba Al Ahly, ibintu bitashimishije Raja Casablanca itozwa na Marc Wilmots wanyuze mu ikipe y’igihugu ya Belgium na Ivory Coast.
Amakipe yombi yinjije penaliti eshanu zayo za mbere, aho nta muzamu wagize amahirwe yo kugira n’imwe akuramo, ariko Al Ahly yegukana igikombe itsinze penaliti 6-5 nyuma yaho myugariro wa Raja Casablanca, Abdelilah Madkour ahushije penaliti ye.
Iyi kipe ikomoka muri Egypt yageze ku mukino wa nyuma wa CAF Super Cup nyuma yo kwegukana CAF Champions League ku nshuro ya 10, mu gihe yegukanye iki gikombe ku nshuro ya munani — nta kipe ifite byinshi kuyirusha.
Umutoza wa Al Ahly aganira n’itangazamakuru nyuma y’umukino yagize ati: “Reka mfate umwanya nshimire abakinnyi, abayobozi b’ikipe n’abafana.
“Twitoje neza penaliti, ndetse twaziteye neza nkuko twabikoze mu myitozo. Byari bigoye cyane, ariko twari twiteze ko bishobora kugenda gutya. Raja yagerageje gutinza umukino, ariko turi Al Ahly kandi duhorana ishyaka.”
Al Ahly ifite amahirwe yo kongera ikindi gikombe cyangwa igihembo kuri ibi mu mikino y’igikombe cy’isi ihuza ama-club iteganyijwe kuba muri Mutarama, ni ubwo bamwe mu bakinnyi bayo b’ingenzi bashobora kuba bakiri kumwe na Egypt mu gikombe cy’Africa cy’ibihugu.
