“Ahubwo n’uko batabizi nge ndatwita nkanibaruka” Umuhanzi Junior Rumaga yaciye amazinwe ku byo kubyarana na Bahali Ruth bamaze iminsi barikoroza

Umusizi Junior Rumaga nyuma y’iminsi we na Bahali Ruth barikubazwa niba barabyaranye basohoye igisigo bise “Rudahinyuka” .

Uyu musizi yagereranyije iki gisigo no kwibaruka ubuheta bwe kuri album ye ya kabiri yatangiye gutegura izaba igizwe n’ibisigo umunani.

Rumaga yabwiye InyaRwanda dukesha iyi nkuru ko ariya mafoto yacicikanye agaragaza Bahali Ruth ameze nk’ukuriwe, yatumye benshi batekereza ko yibarutse umwana, ariko ko mu bijyanye n’inganzo abigereranya no kubyarana iki gisigo na Bahali Ruth.

Yavuze ati “Abantu numvise bavuga ngo nibarutse, ariko ntabwo ari benshi bambajije ngo nibarutse iki! Ni kenshi nagiye mbibabwira ko ibisigo byanjye mbifata nk’abana, kuko nabyo ndabigendera nkabisama nkabitwita mu gihe runaka nkabibyara.”