Social Mula
Abanyamakuru b’imikino ku bitangazamakuru bitandukanye bemeje ko myugariro w’ibumoso Muvandimwe Jean Marie Vianney yasubiye inyuma ku buryo adakwiye kuba akibarizwa mu ikipe ya Rayon Sports.
Ku munsi w’ejo nibwo Rayon Sports yakinnye umukino wa gicuti na Heroes FC yo mu Cyiciro cya Kabiri, umukino urangira Gikundiro inyagiye Heroes ibitego 4-1.
Muri uyu mukino myugariro wa Rayon Sports, Muvandimwe Jean Marie Vianney yitwaye nabi kuko ni we watanze igitego cya Heroes, ndetse yanakoze amakosa menshi yashoboraga kuvamo penaliti.
Mu biganiro by’imikino bitandukanye birimo icyo kuri Radio Isango Star, Radio 10, Flash FM n’andi maradiyo menshi, abanyamakuru bamaze igihe bareba imikino n’imyitozo ya Rayon Sports bagiye bemeza ko Muvandimwe Jean Marie Vianney nta kintu amariye Rayon Sports ndetse ko urwego rwe rw’imikinire ruri hasi ku buryo kumwitegaho umusaruro biri kure nk’ukwezi.
Muvandimwe Jean Marie Vianney yakiniye amakipe atandukanye arimo Gicumbi FC, Police FC na Rayon Sports, kuri ubu asigaranye amasezerano y’amezi atandatu muri Rayon Sports.
