Social Mula
Abakinnyi batandukanye b’ikipe ya Rayon Sports bemeje ko rutahizamu mushya Joachiam Ojera ari umuhanga n’ubwo bigaragara ko yari amaze igihe adakina ku buryo yahita atanga umusaruro ushimishije.
Mu ijoro ryo ku wa Mbere tariki 30 Mutarama 2023 nibwo Joachiam Ojera yasesekaye ku kibuga cy’indege Mpuzamahanga cya Kigali i Kanombe aje gukinira Rayon Sports aho yatijwe amezi atanu na URA FC y’iwabo muri Uganda.
Ku gicamunsi cy’ejo ku wa Kabiri uyu rutahizamu yatangiye imyitozo aho ikipe yitegura gucakirana na mucyeba Kiyovu Sports ku Cyumweru tariki 5 Gashyantare 2023 mu mukino w’umunsi wa 18 wa shampiyona y’Icyiciro cya Mbere.
Bamwe mu bakinnyi ba Rayon Sports twaganiriye bemeje ko Joachiam Ojera atari umukinnyi mubi, ashobora kuzatanga n’ubwo bizasaba igihe kitari munsi y’ukwezi bigendanye n’uko yari amaze igihe adakina ku buryo buhagije.
Ojera yahamagawe kenshi mu Ikipe y’Igihugu ya Uganda guhera mu 2018 ndetse yari muri Uganda Cranes yatwaye Igikombe cya CECAFA Challenge Cup 2019 n’iyakinnye CHAN 2020 yabereye muri Cameroun, itozwa n’Umunya-Ecosse Jonathan McKinstry.
Uyu mukinnyi w’imyaka 25 yabanje muri 11 ba Uganda banganyije n’Amavubi y’u Rwanda 0-0 muri iryo rushanwa kuri Stade de la Réunification tariki 18 Mutarama 2021.
Joackiam Ojera yari muri URA FC yakinnye imikino ya CAF Confederation Cup mu 2021 ikaza gusezererwa na Al Masry SC yo mu Misiri ku ijonjora ry’ibanze.
