Abahanzi bazataramana na Diamond muri BK Arena bamenyekanye n’ibiciro byo kwinjira uko bihagaze

Ku I tariki ya 23 Ukuboza 2022 nibwo biteganyijwe ko umuhanzi w’icyamamare ku mugabane Diamond Platnumz azataramira i Kigali. Hatangajwe abahanzi batandatu bazafatanya n’uyu mugabo kwinjiza abanyabirori b’i Kigali muri Noheli.

Iki gitaramo Diamond Platnumz yatumiwemo cyiswe ‘One People Concert’ cyateguwe na kompanyi ya East Gold, kikazabera muri BK Arena. Usibye uyu muhanzi hatangajwe n’abandi ba hano mu Rwanda bazafatanya gutaramira abazitabira, barimo Bushali, Confy, Kivumbi King, Ariel Wayz, Logan Joe ndetse na Jowest.

Diamond yaherukaga gutaramira i Kigali mu mwaka wa 2019 mu gitaramo cyasozaga iserukiramuco rya Iwacu na Muzika, icyo gihe yatemberejwe mu nyubako ya BK Arena maze agaragaza ko afite inyota yo kuzayitaramiramo.

Amakuru agera kuri BTN avuga uyu muhanzi kugirango aze gutaramira i Kigali, yishyuwe asaga ibihumbi 100$ arenga miliyoni 100 mu mafaranga y’u Rwanda.

Kwinjira muri iki gitaramo agiye gukorera i Kigali ni 5000Frw mu myanya isanzwe, 10000Frw mu myanya yisumbuye, 15000Frw mu myanya y’icyubahiro na 30000Frw mu myanya y’ikirenga.

Ku bazagurira amatike ku muryango hazagenda hiyongeraho ibihumbi 10Frw.