“Yashakaga kumwica aramuhusha” umuvugizi wa Rayon Sports yavuze umukinnyi wa Kiyovu Sports wakoreye ubugome bukomeye Raphael Osaluwe

Umuvugizi wa Rayon Sports, Nkurunziza Jean Paul yavuze ko myugariro w’iburyo mu ikipe ya Kiyovu Sports, Serumogo Ally yakoreye ubugome bukomeye Raphael Osaluwe Olise.

Mu mukino w’umunsi wa 18 wa shampiyona y’Icyiciro cya Mbere nibwo Rayon Sports yari yakiriye Kiyovu Sports umukino urangira banganyije ubusa ku busa.

Ubwo umukino wari ugeze ku munota wa 30, nibwo Raphael Osaluwe Olise yasohotse mu kibuga bitewe n’uko Serumogo Ally Omar yari yamukoreye ikosa, akaba yarasimbuwe na Kanamugire Roger.

Mu Kiganiro Isango Sports cy’ejo ku wa Kane Nkurunziza Jean Paul yavuze ko Serumogo Ally yakoreye ubugome bukomeye Raphael ndetse yemeza ko yashakaga kumwica akamuhusha.

Raphael Osaluwe Olise ntabwo azongera gukandagira mu kibuga kugeza mu mpeshyi y’uyu mwaka, bisobanuye ko azongera gukinira Rayon Sports mu mwaka utaha w’imikino wa 2023-2024.