Yaruhiye ubusa! Ikipe ya Rayon Sports yageze muri Libya umukino uhita usubikwa

Yaruhiye ubusa! Ikipe ya Rayon Sports yageze muri Libya umukino uhita usubikwa.

Umukino ubanza wari guhuza Al Hila SC na Rayon Sports ku wa Gatanu, tariki ya 15 Nzeri, mu ijonjora rya CAF Confederation Cup, wasubitswe kubera ko Libya iri mu cyunamo nyuma yo kubura abasaga 5000 bishwe n’inkubi y’umuyaga, byatumye iyi kipe yo mu Barabu yifuza ko imikino yombi yabera i Kigali.

Rayon Sports yageze i Benghazi mu gitondo cyo kuri uyu wa Gatatu, tariki ya 13 Nzeri, ariko Al Hilal zari guhura ku wa Gatanu ikaba yari yandikiye CAF isaba ko umukin wasubikwa.

Inama yahuje amakipe yombi ku gicamunsi ni yo yavuyemo ubwumvikane bwo gusubika umukino, ndetse imikino yombi ikaba yabera i Kigali.

Umunyamakuru wa B&B FM, Imfurayacu Jean Luc, uri kumwe na Rayon Sports muri Libya, yagize ati “Imikino yombi, Abanya-Libya basabye Rayon Sports ko yakwemera ikabera i Kigali. Yabyemeye, hasigaye umugisha wa CAF.”

Umukino ubanza wagombaga kubera i Benghazi ku wa Gatanu naho uwo kwishyura ukabera i Kigali ku wa 29 Nzeri 2023.

Ikipe izakomeza hagati y’izi zombi, izajya mu matsinda ya CAF Confederation Cup.