THIERRY Mugiraneza
Mu ijoro ry’ejo kuwa kane ikipe ya Al Nassr Cristiano Ronaldo asigaye abereye kapiteni, yandagazaga ikipe ya Al Wehda itsinda ibitego bine ku busa mu mukino wa shampiyona y’ikiciro cya mbere cya Arabia Saudite.
Uyu mukino Cristiano Ronaldo yatsindiyemo ibitego bine wenyine haba ku munota wa 21, 40,53 na 61.
Uyu mukino Cristiano Ronaldo yongeye kuwandikiramo amateka akomeye muri ruhago y’isi nk’uko yari asanzwe adushyiraho.
Uduhigo dutanu Cristiano Ronaldo yaraye yesheje:
1. Cristiano Ronaldo yaraye abaye umukinnyi wa mbere utsinze ibitego bine mu mukino umwe wa shampiyona mu mateka ya shampiyona y’ikiciro cya mbere muri Arabia Saudite.
2. Mu ijoro rya keye Cristiano Ronaldo yandikaga andi mateka yo gutsinda ibitego birenze bitatu mu mukino umwe , inshuro 11 kuva yatangira gukina nk’uwabigize umwuga.
3. Cristiano Ronaldo yandikaga andi mateka yo gutsinda ibitego bitatu mu mukino umwe ( Hattrick) ku nshuro ya 61 mu mateka ye. Inshuro 40 yabikoze mu mikino ya shampiyona.
4. Cristiano Ronaldo yaraye atsinze igitego cye cya 500 muri shampiyona.
5. Ejo ubwo Cristiano Ronaldo yatsindaga ibitego bine mu mukino wenyine, byatumye yuzuza ibitego 503 yatsinze mu mashampiyona atanu n’amakipe atanu amaze gukinira.
Ronaldo yatsinze ibitego 311 muri LaLiga agikinira Real Madrid, yatsinze 103 muri Premier league akinira Manchester United, yatsinze ibitego 81 muri SerieA agikinira muri Juventus, ibitego bitatu muri Sporting CP y’iwabo muri Portugal ndetse n’ibitego bitanu amaze gutsindira muri shampiyona ya Arabia Saudite.
