Yafatiwe i Kigali: Wa mugore wo mu Ruhango ukekwaho kica urubozo mukeba we, yafashwe

Umugore wo mu karere ka Ruhango mu murenge wa Bweramaba ukekwaho kwica atemaguye mukeba we witwa Musanabera Béatrice wari mu kigero cy’Imyaka 50 y’amavuko, uyu ukekwaho ubu bwicanyi yafatiwe mu Gatsata.

Uyu mugore yafatiwe i Karuruma mu Murenge wa Gatsata mu gitondo cyo ku wa Mbere, tariki ya 19 Kamena 2023.

Amakuru avuga ko uyu nyakwigendera wari utuye mu kagari ka Buhanda, yabanje gutonganira mu kabari n’uyu mugore basangiye umugabo, basohoka basa n’abatashye ariko bagenda batonganira mu nzira.

Nk’uko abaturage babivuga, Mukeba we yagiye mu nzu afata umuhoro aramutemagura asiga umurambo aho aracika.

Ubu uyu mugore ukekwaho ubwicanyi, agiye kujyanwa mu Ruhango avanwe aho yafatiwe mu Gatsata, umurambo wa Musanabera wo wajyanywe mu Bitaro by’iGitwe gukorerwa isuzuma.