Volcano yo mu Rwanda yakoze impanuka ikomeye

Mu rukerera rwo kuri uyu wa Gatanu,tariki ya 30 Ukuboza 2022 nibwo imodoka ya Volcano yo mu Rwanda yakoze impanuka igonze Oxgen yo muri Kenya.

Ni impanuka yatwaye ubuzima bw’abantu batandatu aho Volcano yo mu Rwanda n’iya Oxygen yo muri Kenya zagonganye. Iyi mpanuka yabereye mu gace ka Rwahi mu burengerazuba bwa Uganda nk’uko amakuru ya Daily monitor abivuga.

Iki kinyamakuru kivuga ko iyi mpanuka y’imodoka ya Volcano ifite ibirango bya RAD798B ndetse n’indi modoka yo mu bwoko bwa bisi na yo itwara abagenzi yo muri Kenya izwi nka Oxygen ifite ibirango bya KCU 054L, yahise ihitana abantu batandatu (6).

Elly Maate, umuvugizi wa Polisi ya Uganda mu gace kitwa Kigezi, yavuze ko iyi mpanuka yabaye mu gitondo cya kare cyo kuri uyu wa Gatanu, ishobora kuba yaturutse ku ku kirere kitasaga neza kuko hariho ibihu byatumaga abashoferi batabona neza imbere.

Bivugwa ko uretse abantu batandatu bahise bitaba Imana barimo n’abashoferi bari batwaye izo modoka, hanakomeretse abagenzi bagera muri mirongo itatu (30).