Virunga: Inzovu yacitse Pariki maze abaturage bayisamira hejuru barayirya barayimara

Inzego zishinzwe kurengera inyamaswa muri Repubulika Iharanira Demokarasi ya Congo zatangaje ko hari inzovu yatorotse Parike y’Igihugu ya Virunga, abanti bitwaje intwaro barayica ndetse abaturage barayirya.

Amakuru dukesha itangazamakuru ryo muri RDC avuga ko ibi byabaye kuri uyu wa Mbere tariki 9 Ukwakira mu 2023. Bivugwa ko inzovu zatorotse iyi parike zari ebyiri ariko imwe iza kwicwa ndetse abaturage barayirya, mu gihe indi hataramenyekana irengero ryayo.

Ikigo gishinzwe kurengera urusobe rw’Ibinyabuzima muri iki gihugu, ICCN rwatangaje ko izi nzovu zatorotse kuko uruzitiro rwari rurimo umuriro w’amashanyarazi rwangijwe.

Kugeza ubu bivugwa ko iyi nzovu yishwe n’abantu bari bitwaje intwaro gusa ntibaramenyekana. Inzego zishinzwe kurengera inyamaswa zasabye ko hakorwwa iperereza ryimbitse kuri iki kibazo.