Kubwayo Mc croix
Umukinnyi w’umunya-Brazil Vinicius Junior, umwe mu bakinnyi bakunzwe cyane muri Real Madrid, yanze kongera amasezerano mashya yari yahawe n’iyi kipe yo muri Espagne. Ibi byatumye hashyirwa mu majwi ahazaza h’uyu mukinnyi muri iyi kipe, aho benshi mu bafana n’abasesenguzi batangiye kwibaza niba agifite umugambi wo kuguma muri Real Madrid cyangwa niba ashobora gushaka undi mwuga mu yindi kipe.
Vinicius Jr, w’imyaka 24, amaze imyaka itandatu muri Real Madrid, akaba yarigaragaje nk’umukinnyi uhamye ku mwanya we, ashyigikira cyane ubusatirizi bw’iyi kipe. Nyuma yo kugera muri iyi kipe akiri muto, yakomeje gukura mu mikinire ye, ndetse ahinduka imwe mu nkingi za mwamba z’iyi kipe mu guhatanira ibikombe bikomeye by’i Burayi n’ibya Espagne. Umwaka ushize, yagaragaje umusaruro ukomeye cyane, ndetse ahabwa agaciro gakomeye nk’umwe mu bakinnyi ba Real Madrid bafite ahazaza heza.
Gusa, n’ubwo Real Madrid yagaragaje ubushake bwo gukomezanya na Vinicius, ndetse ikaba yaramuhaye amasezerano mashya kugira ngo yongere igihe cye muri Santiago Bernabéu, uyu mukinnyi yanze gusinya ayo masezerano. Ibi byatumye abasesenguzi mu mupira w’amaguru bavuga ko bishobora kuba hari ibindi bimushishikaje hanze ya Real Madrid cyangwa se ko ashobora kuba agifite impungenge ku hazaza he muri iyi kipe, cyane ko hari n’andi makipe menshi yifuza kubona umukinnyi w’ubuhanga bwe.
Nk’uko amakuru abivuga, hari impamvu nyinshi zishobora kuba ziri inyuma y’iki cyemezo cya Vinicius Jr. Mu gihe bamwe bavuga ko ashobora kuba asaba kongererwa umushahara cyangwa se guhabwa imyanya y’ubuyobozi muri Real Madrid, abandi bashidikanya ku ntego n’ubushake afite bwo kuguma mu ikipe.
N’ubwo ibi byose bikomeje kuvugwa, nta kiramenyekana ku cyemezo cya nyuma cya Vinicius Jr ku hazaza he. Hari amakipe akomeye yo mu Bwongereza no mu Butaliyani akomeje kumureba, nk’uko bivugwa mu bitangazamakuru by’i Burayi. Ariko kandi, abafana ba Real Madrid baracyafite icyizere ko uyu mukinnyi ashobora kongera gutekereza neza ku cyemezo yafashe, agasanga ko gukomeza gukinira iyi kipe ari cyo gisubizo cyiza ku hazaza he mu mwuga w’umupira w’amaguru.
Mu buryo bwose, icyemezo cya Vinicius Jr kiri gutuma abafana ba Real Madrid bakomeza kugira ubwoba . Gusa ikizwi ni uko, niba uyu mukinnyi yafata icyemezo cyo kuva muri Real Madrid, bizaba ari igihombo gikomeye kuri iyi kipe, cyane ko yari imufiteho icyizere nk’umukinnyi ufite umuvuduko, ubuhanga, ndetse n’impano yo gutsinda ibitego mu bihe bikomeye.
