Urutonde rw’abakinnyi 11 APR FC izabanza mu kibuga biteguye guha isomo rya ruhago US Monastir

Ku gicamunsi cy’ejo ku wa Gatandatu tariki 10 Nzeri 2022, ikipe ya APR FC izatangira urugendo rwa TOTAL CAF Champions League aho izakira ikipe ya US Monastir FC yo mu gihugu cya Tunisia.

Uyu mukino amakipe yombi awiteguranye imbaraga nyinshi, aho ikipe ya APR FC yatangiye umwiherero mu Karere ka Huye ku wa Kabiri tariki 6 Nzeri, mu gihe US Monastir FC yageze mu Rwanda ku wa Gatatu tariki 7 Nzeri.

Amakuru akomeje kuvugwa ni uko abakinnyi bose ba APR FC bafite intego yo kuzatsinda US Monastir FC ikinyuranyo cy’ibitego bibiri bakazasigara bategereje kuzareba uko bazitwara mu mukino wo kwishyura.

Mu ijoro ryakeye muri iyi kipe y’Ingabo z’Igihugu hatashyemo inkuru nziza aho Mohammed Adil Erradi yemerewe gutoza imikino Nyafurika yicaye ku ntebe y’abatoza bitandukanye no mu myaka ibiri ishize aho yabaga yicaye muri Sitade.

Urutonde rw’abakinnyi 11 APR FC ishobora kuzabanza mu kibuga

Umuzamu : Ishimwe Jean Pierre

Ba myugariro : Omborenga Fitina, Niyomugabo Claude, Buregeya Prince na Niyigena Clement.

Abo hagati : Mugisha Bonheur, Ruboneka Jean Bosco na Manishimwe Djabel.

Ba rutahizamu : Bizimana Yannick, Mugunga Yves na Kwitonda Alain Bacca.

Umukino wo kwishyura hagati ya APR FC na US Monastir FC uzabera muri Tunisia nyuma y’icyumweru kimwe bakinnye umukino ubanza, ikipe izakomeza ikaba izahita icakirana na Al Ahly yo mu Misiri mu ijonjora rya kabiri rivamo amakipe ahita yerekeza mu matsinda.