Uruganda rwa Skol rwategeye Rayon Sports akavagari k’amafaranga niramuka yegukanye igikombe cy’Amahoro n’icya shampiyona

Uruganda rwa Skol Brewery Limited rusanzwe rutera inkunga Rayon Sports y’Abagabo n’ikipe y’Abagore rwategeye Rayon Sports Women FC miliyoni eshatu z’Amanyarwanda nibaramuka begukanye igikombe cya shampiyona y’Icyiciro cya Kabiri na miliyoni eshatu z’Amanyarwanda nibaramuka begukanye igikombe cy’Amahoro, ibitwaye byombi yazahabwa miliyoni 6.

Ikipe ya Rayon Sports y’abagore yatangiye neza mu gikombe cy’Amahoro inyagira Macuba WFC y’i Nyamasheke 6-0.

Ni umukino wabereye mu Nzove ejo ku wa Gatatu tariki 15 Gashyantare 2023.

Rayon Sports yatsindiwe n’abakinnyi 3: Imanizabayo Florence watsinze ibitego 2, Judith Atieno atsinda 2 ndetse na Mukeshimana Dorothée uheruka kuza muri iyi kipe atsinda ibitego 2.

Umukino wo kwishyura uteganyijwe ku wa gatatu tariki 22 Gashyantare 2023 i Nyamasheke.