Undi mukinnyi wa Rayon Sports byemejwe ko agiye kwirukanwa nyuma ya Traoré na Kabwili

Nyuma ya Boubacar Traoré ndetse na Ramadhan Kabwili byamaze kwemezwa ko bagiye gusezererwa, ubuyobozi bwanemeje ko Mussa Camara agomba kugenda.

Ku munsi w’ejo hashize ubuyobozi bwa Rayon Sports bwakoranye inama na Haringingo Francis umutoza w’iyi kipe, yiga ku mikinire y’iyi kipe nuko intsinzi igomba kuboneka muri iyi mikino yo kwishyura igiye kuza, bemeza ko hari abakinnyi iyi kipe igomba gusezerera hakongerwamo andi maraso mashya.

Nyuma y’inama yabanje ikemeza ko uyu mutoza akomezanya na Rayon Sports ikanemeza ko Boubacar Traoré ndetse na Ramadhan Kabwili bagomba kwerekwa imiryango, ubuyobozi na Haringingo mu nama baraye bakoranye bongeyeho na Mussa Camara waje afite imvune ndetse n’umubyibuho ukabije bigatera benshi agahinda.

Amakuru YEGOB ikura mu bakurikirana cyane ikipe ya Rayon Sports, ni uko iyi kipe igiye guhita ishaka undi mukinnyi utaha izamu ugomba gusimbura Mussa Camara ugiye gusezererwa akajya afatanya na Mussa Essenu umaze iminsi afite imvune.

Ikipe ya Rayon Sports biteganyijwe ko uyu munsi irasinyana amasezerano na Heritier Luvumbu Nzinga umaze umunsi umwe ageze mu Rwanda kumvikana n’iyi kipe. Uyu mukinnyi yitezweho guhindura byinshi mu ikipe ya Rayon Sports haba mu mikinire ndetse no mu kuganiriza abakinnyi ibyatuma batwara igikombe uyu mwaka nk’umukinnyi ukuze mu mutwe ndetse unafite ubunararibonye.