Umwe mu bayobozi bakomeye ba FERWAFA yemeje ko igitego Rayon Sports yatsinze APR FC atari cyo

Umuyobozi ukuriye Ishyirahamwe ry’abasifuzi muri FERWAFA, Sekamana Abdoul ‘Sekebe’ yemeje ko igitego Rayon Sports yatsinze APR FC atari cyo kuko kitigeze kirenga umurongo.

Ku wa Gatandatu tariki 18 Gashyantare 2023, nibwo ikipe ya Rayon Sports yatsinze APR FC igitego kimwe ku busa mu mukino w’umunsi wa 19 wa shampiyona y’Icyiciro cya Mbere.

Nyuma y’uko uyu mukino urangiye impaka zakomeje kuba nyinshi aho benshi bemeza ko igitego kitarenze umurongo w’izamu abandi bakemeza ko cyarenze umurongo.

Mu kiganiro Urukiko rw’Ubujurire rw’Imikino cya Radio Fine FM cy’ejo ku wa Kabiri tariki 21 Gashyantare, Sekamana Abdoul ‘Sekebe’ yavuze ko igitego cya Rayon Sports kitarenze umurongo w’izamu rya APR FC ryari ririnzwe na Ishimwe Jean Pierre.

N’ubwo kugeza ubu hakiri urujijo ariko Ishyirahamwe ry’Umupira w’Amaguru mu Rwanda ‘FERWAFA’ ryatangaje ko nta kintu na kimwe rizahindura ku byavuye ku mukino Rayon Sports yatsinzemo APR FC.