Kubwayo Mc croix
Umukinnyi w’imyaka 31 y’amavuko ukina mu kibuga hagati Carlos Henrique Casimiro aricuza impamvu yagiye mu ikipe ya Manchester United bitewe n’uko iyi kipe ibayeho mu buyobozi bwayo budahamye (Institutional instability).
Casemiro yageze muri Manchester United muri Kanama mu mwaka ushize wa 2022 avuye muri Real Madrid kuri miliyoni £60. Casemiro ukomoka muri Brazil ni umwe mu babaye inkingi za mwamba muri iyi kipe ya Manchester United kuko asa nk’uwatanze uburinganire mu kibuga hagati h’iyi kipe ariko kandi ngo hanze y’ikibuga Casemiro ntiyishimiye imikorere y’iyi kipe.
Ikinyamakuru El Nacional cyanditse inkuru kivuga ko Casemiro ntagihe kirambye afite muri Manchester United ngo kuko abona ubuyobozi bw’iyi kipe budakora uko bikwiye (Butari tayali) ari nayo mpamvu yicuza kuba yaraje muri iyi kipe. Ubuyobozi bwa Manchester United buyobowe ku ruhembe n’umuryango wa ba Glazers.
N’ubwo bimeze gutyo ariko, Manchester United ntiyiteguye kugurisha Casemiro muri Mutarama umwaka utaha cyane ko agifite amasezerano muri iyi kipe azamugeza muri 2026.
