SALIM Prince Waziel
Weston Gosa Jr., umuhungu wa Whitney Purvis wamenyekanye mu kiganiro cya televiziyo “16 and Pregnant”, yapfuye afite imyaka 16 nk’uko Whitney yabitangaje abinyujije ku rubuga rwa Facebook.
Whitney, wahoze ari umubyeyi muto wagaragaye muri Season 1 y’icyo kiganiro, yashyize hanze aya makuru ababaje ku wa Mbere, asangiza ifoto igaragaza bombi bishimye. Muri iyo foto, Whitney yafashe umuhungu we mu maboko ye amufashe urukundo.
Yagize ati:
“Uruhukire mu mahoro, mwana wanjye Weston. Ndagukunda iteka ryose, ntibisanzwe. Sinzigeze menya impamvu ubuzima bushobora kuba bubi gutya. Uzahora uri umwana wanjye.”
Whitney ntiyigeze atangaza icyateye urupfu rw’umwana we muri iyo nyandiko… Ariko mukase wa Weston, witwa Amy Gosa, na we yanditse ku rupfu rwa Weston, avuga ko bagerageje kumubyutsa saa moya za mu gitondo ntibabishobora.
Amy yavuze ko bagerageje kumusubizamo umwuka bakoresheje CPR, banahamagara imbangukiragutabara. Abaganga bahageze bihuse bamujyana ku bitaro bya hafi, ari na ho bemeje ko yapfuye.
Umuryango uracyategereje ibisubizo by’ibizamini byo kwa muganga (autopsy), nk’uko Amy Gosa yabitangaje. Yongeyeho ko Weston yari afite ibibazo byinshi by’ubuzima, harimo n’indwara ya diyabete.
Weston yavukiye ku itariki ya 2 Mata 2009. Whitney yari atwite inda ye ubwo we n’uwo babyaranye na we witwa Weston bari mu gice cya mbere cya “16 and Pregnant”.
Nyuma yo kuva muri icyo kiganiro, Whitney Purvis yaje gutakaza uburenganzira bwo kurera Weston n’undi muhungu we witwa River. Mu mwaka ushize, yatawe muri yombi ashinjwa kutishyura indezo z’abana be.
Umunyamakuru yagerageje kuvugisha Whitney ngo agire icyo atangaza birambuye… ariko kugeza ubu, nta gisubizo aratanga.
