HARAGIRIMANA Dieudonne
Ubwo yasuraga ikipe ya APR F.C Chairman wa APR F.C ari kumwe na Maj Gen Eric MUROKORE, yongeye kwibutsa abakinnyi b’iyi kipe ko kizira kunganya muri APR F.C ko bagomba gutsinda buri mukino, anasaba abakinnyi ko bagomba guha impano ya Noheli n’ Ubunani abakunzi ba APR F.C
” Icya kabiri cyanzanye ni uko urugamba rutararangira turacyafite umukino na Etincelles, bityo ndagira ngo mbasabe mutange ibyo mufite byose mbere yuko dutangira imikino yo kwishyura. Abakunzi ba APR F.C badahwema kutugaragariza urukundo igihe cyose, tugomba kubaha intsinzi cyane ko nabo bayigiramo urubare”
Maj Gen Eric MUROKORE mu butumwa bwe yabanje gushimira ikipe yose kubwo intsinzi bakuye kuri Rayon Sports byumwihariko Yannick Bizimana watsinze igitego kimwe rukumbi cyabonetse muri uyu mukino
Yagize ati” Ndabanza kubashimira kubyo mwakoze kuri uriya mukino, mwagaragaje ko inama twari twabagiriye zagize akamaro cyane. Mweretse abandi ko Abakinnyi b’ Abanyarwanda batsinda ikipe ifitemo Abanyamahanga munabarusha byumwihariko Yannick rwose wakoze ibikomeye uduha intsinzi kiriya gitego cyari kiza”
Yakomeje abizeza ko uko bitwaye mu mikino iherutse no gutsinda Etincelles byaborohera.
Yagize ati” Uko mwitwaye mu mikino ibiri ishize, biratanga ikizere ko n’umukino wejo mwakwitwara neza mworohereze abataka mubaha imipira ubundi nabo bashyire mu izamu niyo batatsinda ako kanya, ariko ntibyarenga gatatu igitego kitarajyamo ejo tuzaba duhari tubakurikira nk’uko Chairman yabivuze, ejo mwongere mudushimishe kuko murashoboye”
Etincelles irakira APR F.C kuri uyu wa Kane saa cyenda zuzuye/1500Hrs kuri Stade Umuganda.
