Umutoza w’ikipe ya Arsenal Mikel Arteta yikomanze mu gatuza aburira Manchester city

Umutoza w’ikipe ya Arsenal Mike Arteta yaburiye Manchester City yibwira ko yamaze gutwara igikombe cya shampiyona y’icyiciro cya mbere mu Bwongereza kandi nabo bakiri kugihatanira.

Ikipe ya Arsenal yambuwe umwanya wa mbere yari imazeho igihe kinini na Manchester City nyuma yo gutsinda Fulham ibitego 2-1 mu mpera z’iki cyumweru. Iyi kipe y’Abarashi imaze imikino 4 idatsinda, iraza kwakira Chelsea uyu munsi saa tatu z’ijoro.

Uyu mukino baramutse bawutsinze basubira ku mwanya wa mbere nubwo barusha imikino Manchester City akaba ari yo mpamvu Arteta abona Pep Guardiola akwiriye kwitonda.

Umutoza wa Arsenal ejo ari mu kiganiro n’itangazamakuru gitegura umukino wa Chelsea, yaburiye Manchester City ati: “Turacyafite igice cyiza cyo gukinira muri shampiyona. Hasigaye imikino itanu, mu by’ukuri ntabwo byarangiye”.

“Mu mwaka utaha w’imikino tuzishyura amafaranga menshi kugira ngo twongere kuba kuri uyu mwanya mwiza. Gusa ndashaka kubyaza umusaruro uyu umwanya dufite nonaha nkajya gutsinda na Chelsea, icyo ni cyo tugomba gukora”.

Nubwo umutoza wa Arsenal avuga gutya, ibintu bisa nk’aho byarangiye kuko Manchester City ikomeje kwerekana umuvuduko udasanzwe muri iyi imikino ya nyuma.