HARAGIRIMANA Dieudonne
Muri iyi minsi ishize Musanze FC yakinnye na Gasogi United mu mukino w’umunsi wa 13 wa shampiyona, iza gutsindwa igitego 1-0 byababaje abakunzi b’iyi kipe.
Musanze FC yari mu byishimo by’ikirenga nyuma y’aho yari iherutse gutsinda Rayon Sports ibitego 2-0, nabwo umukino wari wabereye ku Bworoherane.
Nshimiyimana Maurice yagiye gutoza umukino wa Gasogi United akubutse mu gihugu cya Uganda, aho yari yagiye gushaka ibyangombwa bya CAF by’ubutoza bwo mu bwoko bwa B. Uyu mutoza wari umaze amezi 2 muri iki gihugu, yagiye mbere y’umutoza mukuru Frank Ouna nawe wagiye iwabo muri Kenya kwivuza, aho yasize ikipe yiteguraga umukino wa Rayon Sports.
Amakuru yamenyekanye ni uko Nshimiyimana Maurice yaraye aganiriye n’ubuyobozi bwa Musanze FC bumvikana gutandukana, ndetse bamuha ibyo bamugomba nawe ahita yigarukira i Kigali.
Bivugwa ko Maso intandaro yo gutandukana n’ikipe yabaye gutsindwa na Gasogi United, dore ko bari bamusabye ko yareka abatoza bari bafite ikipe bagasoza imikino ibanza ya shampiyona, ngo ababwira ko atabikozwa agomba gutoza kuko ariwe mutoza mukuru uhari.
