Social Mula
Umutoza wa Musanze FC, Frank Onyango Ouna yemeje ko Essomba Leandre Willy Onana na Hakizimana Adolphe ari abakinnyi bakomeye muri shampiyona y’Icyiciro cya Mbere mu Rwanda.
Ku mugoroba wo ku wa Gatanu tariki 7 Ukwakira 2022, Rayon Sports yageze ku mukino wa nyuma w’Irushanwa rya Made in Rwanda Cup 2022 nyuma yo gutsinda Musanze FC kuri penaliti 4-2 ubwo amakipe yombi yari yanganyije ubusa ku busa.
Penaliti za Rayon Sports zinjijwe na Ndekwe Felix, Mitima Isaac, Paul Were na Leandre Onana. Imwe yatewe ari iya kabiri, yari yahushijwe na Muvandimwe Jean Marie Vianney wayiteye hejuru.
Ku ruhande rwa Musanze FC, penaliti ebyiri za mbere zahushijwe na Ben Ocen na Niyonshuti Gad mu gihe izindi zatsinzwe na Niyijyinama Patrick na Namanda Luke Wafula.
Nyuma y’umukino umutoza wa Musanze FC, Frank Onyango Ouna yavuze ko Rayon Sports yabarushije kuba yari ifite abafana benshi bayishyigikiye, yongeraho ko umuzamu wa Rayon Sports na Essomba Onana ari abakinnyi bafite impano ikomeye.
Yagize ati “Rayon Sports ni ikipe yaturushije gutera Penaliti neza bitewe n’uko yari ishyigikiwe n’abafana bayo benshi, ikindi bagize umuzamu witwaye neza ndetse na rutahizamu (Essomba Onana) wateye Penaliti ya nyuma ni umuhanga”.
Ku mukino wa nyuma urakinwa kuri iki Cyumweru Saa Kumi n’Ebyiri, Rayon Sports irahura na Kiyovu Sports yasezereye Mukura Victory Sports iyitsinze igitego 1-0 cyinjijwe na Serumogo Ally ku munota wa 82.
