Social Mula
Umutoza Roberto Oliveira Gonçalves do Carmo uzwi nka Robertinho ukomoka mu gihugu cya Brazil yatangiye kuvugwa mu ikipe yo APR FC irimo umwuka mubi hagati y’abakinnyi n’umutoza Mohammed Adil Erradi.
Kuva mu ijoro ryo ku wa Gatatu tariki 12 Ukwakira 2022 hatangiye gutuma umwiryane muri APR FC, aho umutoza Mohammed Adil Erradi yabwiye itangazamakuru ko Manishimwe Djabel atari umukinnyi kamara bitewe n’uko adatanga umusaruro ushimishije.
Uyu mukinnyi akimara kumva ibyo umutoza yamuvuzeho yahise yihutira kumusubiza mu kiganiro yagiranye na Radio 1, avuga ko iyo umuntu mwasangiye ibyiza muba mugomba no gusangira ibibi, ko iyo wihakanye umugabo mugenzi wawe ko nta mugabo uba ukurimo.
Uku guterana amagambo byatumye ubuyobozi bwa APR FC bwicara bufata icyemezo cyo guhagarika umutoza Mohammed Adil Erradi igihe kitazwi, ndetse na Manishimwe Djabel ahagarikwa ukwezi.
Mu gitondo cyo kuri uyu wa Gatandatu nibwo ibihano byafatiwe Manishimwe Djabel na Mohammed Adil Erradi byagiye hanze, bikaba bivugwa ko uyu mutoza ashobora gutandukana n’iyi kipe igahita izana Roberto Oliveira Gonçalves do Carmo uri gutoza Vipers yo muri Uganda.
Amakuru dukesha Radio 10, ni uko ushizwe gushakira inyungu umutoza Roberto Oliveira Gonçalves do Carmo yatangiye gukora ibishoboka byose ngo uyu mutoza ahabwe akazi mu Ikipe y’Ingabo z’Igihugu.
Robertinho ni umwe mu batoza banditse amateka mu Rwanda ubwo yari muri Rayon Sports, kuko yafashije iyi kipe kugera muri 1/4 cya CAF Confederations Cup bwa mbere mu mateka yayo, hari muri Kanama 2018 ndetse ayihesha igikombe cya shampiyona umwaka w’imikino 2018-2019.
Nyuma y’umwaka umwe atandukanye na Rayon Sports, akaba yaraje kugirwa umutoza wa Gor Mahia yo muri Kenya asimbuye Steven Palack wari umaze gutandukana n’iyi kipe ku bwumvikane.
Uyu mugabo w’imyaka 62 y’amavuko yabaye umukinnyi ukomeye aho yanahamagawe mu Ikipe y’Igihugu ya Brazil, mu y’andi makipe yatoje harimo Fluminense, Brasil de Pelotas, Al-Shamal, Rio Branco (SP), Grombalia Sports na Hammam-Sousse.
