HARAGIRIMANA Dieudonne
Igisirikare cya Nigeria cyataye muri yombi umusirikare witwa Sofiyat Akinlabi kimuziza kwemera kwambikwa impeta kandi yambaye impuzankano y’akazi (uniform).
Ni nyuma y’aho mu cyumweru gishize ku mbuga nkoranyambaga hakwirakwiye amashusho agaragaza uyu mukobwa yambikwa impeta n’umusore wambaye imyambaro ya gisivili, igikorwa cyakorewe ku karubanda.
Umuvugizi w’igisirikare cya Nigeria, Gen. Clement Nwachukwu yabwiye BBC ko ibyo uyu mukobwa yakoze bihabanye n’amahame ngengamyitwarire y’akazi, by’umwihariko ajyanye n’ikoreshwa ry’imbuga nkoranyambaga. Ati:’’Imyitwarire ye ihabanye na gahunda nziza n’iy’igisirikare’’.
Gen. Nwachukwu yanahishuye ko umusore wambitse impeta/watereye ivi uyu mukobwa ari umwe mu rubyiruko ruhabwa amasomo n’igisirikare ajyanye no gukorera igihugu.
Bivugwa ko mbere yo kujya kwambikwa impeta, uyu musirikare yabanje kwiheza kuri bagenzi be bafatanya guha amasomo uru rubyiruko mu kigo cyarwo cyihariye.
