Umunyamakuru ukunzwe cyane yinjiye muri Cinema Nyarwanda.

Umunyamakuru w’imyidaguduro ukunzwe n’abatari bake hano mu Rwanda, ukorera Isibo Tv, muri the Choice live, Philbert Nizeyimana uzwi nka DJ Phil Peter avuga ko yamaze kwinjira muri cinema nyarwanda.Ndetse avuga ko agiye kugaragara muri filime y’uruhererekane bise ‘Komisineri’.

Iyi filime igiye gutangira kujya hanze, igaragaramo abakinnyi b’ibyamamare basanzwe barubatse amazina muri sinema.

Mu bakinnyi bazagaragara muri filime ‘Komisiyoneri’ harimo nka; Ngabo Leo (Njuga) wamenyekanye muri Seburikoko, Ndimbati uzwi muri Papa Sava,Phil Peter nyirizina, n’abandi benshi.

Nubwo iyi filime izajya ica kuri Phil Peter Tv, ariko ngo ntabwo ari iye gusa ahubwo afite ikipe bafatanyije.Phil Peter yagize ati “Ni filime izajya itambuka kuri shene yanjye ya YouTube, ariko si ukuvuga ko ari iyanjye. Nyihuriyemo n’abantu benshi gusa ni nziza nibaza ko abakunzi ba sinema nyarwanda bazayikunda.”

Uyu musore yavuze ko iyi filime ari igitekerezo yagiranye n’inshuti ze bakagishyira mu bikorwa mu rwego rwo gushyigikira iterambere rya sinema nyarwanda.

Ati “Sinema nyarwanda iri gutera imbere, buri wese yakwishimira urwego igezeho. Natwe rero tuje kugira itafari ryacu dushyiraho.”