Umunyamakuru Sam Karenzi yasabye Perezida wa Rayon Sports kwegura muri iyi kipe y’abafana benshi mu Rwanda

Umunyamakuru ukomeye mu mikino mu Rwanda, Sam Karenzi yasabye Perezida wa Rayon Sports kwegura ku nshingano ze.

Umunyamakuru Sam Karenzi yasabye Perezida Uwayezu Jean Fidele uyobora ikipe ya Rayon Sports kwegura muri iyo kipe kubera ko nta kintu ayimariye.

Ibi yabitangaje mu kiganiro akora kuri Fine Fm kizwi nka ‘Urukiko Rw’ubujurire’ aho icyamuteye kuvuga ibi ari abakinnyi iyi kipe imaze iminsi iguze.

Uyu munyamakuru avuga ko Perezida wa Rayon Sports atayikunda kuko ngo abaye ayikunda ntabwo yayigurira abakinnyi nka bo amaze iminsi agura.

Muri iyi minsi Rayon Sports iri kugura abakinnyi batari kwishimirwa n’abafana bayo, aho bari gutebya bavuga ko ari kugura ‘imifungo’.

Rayon Sports nk’ikipe y’ubukombe kandi ifite abafana benshi mu Rwanda yari imenyereweho kugura abakinnyi b’amazina aremereye kandi avuye mu makipe akomeye.

Abafana ba Rayon Sports bavuga ko ikipe yabo aho iri kugana batahazi, aho babivuga bashingiye ku kuba iyi kipe itari yagura umwataka ukomeye w’umunyamahanga.

Kuri ubu Rayon Sports imaze kugura abakinnyi barenga 11, gusa muri abo ntamwataka w’umunyamahanga urimo.