Umunyamakuru Ruvuyanga wa RBA yabenzwe n’umukunzi we biteguraga kurushinga

Umunyamakuru Nkurunziza Emmanuel wamenyekanye nka Ruvuyanga mu itangazamakuru yabenzwe n’umukobwa yaherukaga gutangaza ko bari mu rukundo.

Ruvuyanga yabenzwe na Ntiyamira Phionah yaherukaga kwerekana ko bari mu munyenga w’urukundo.

Muri Mutarama umwaka ushize nibwo Ruvuyanga yatangaje ko ari mu rukundo na Phionah ndetse ko bari bari no kwitegura kurushinga.

Gusa nyuma yo kumwerekana abantu bategereje ko atera ivi baraheba, none amakuru ahari ni uko abo bombi bamaze amezi arenga atandatu batandukanye.

Mu kiganiro Ruvuyanga yagiranye na Yago TV Show ikorera ku muyoboro wa YouTube, yemeje ko yatandukanye na Phionah.

Yavuze ko Phionah ari we wamubenze kubera impamvu uyu munyamakuru ukunzwe mu mikino atashatse gutangaza.

Ruvuyanga avuga ko bamaze hafi amezi atandatu batakiri kumwe ndetse na nyuma gutandukana kwabo, Phionah yahise afunga amayira yose yamuhuzaga n’uyu munyamakuru.

Ruvuyanga akomeza avuga ko yari afite umugambi wo kubana na Phionah gusa ngo ntabwo byakunze.