Umunyamakuru Kazungu Clever yagiriye inama Rayon Sports yo kwirukana Haringingo Francis, anahishura umutoza w’Umunyarwanda ukwiye kumusimbura

Umunyamakuru w’imikino kuri Radio 10, Kazungu Clever afatanyije na Mugenzi Faustin na Nsengiyumva Emmanuel (Emmy Rwanda) bemeje ko ikipe ya Rayon Sports yari ikwiye gufata umwanzuro wo kwirukana umutoza Haringingo Francis Christian.

Mu kiganiro Urukiko rw’Imikino cyo kuri uyu wa Gatandatu tariki 7 Mutarama 2023, abanyamakuru barangajwe imbere na Kazungu Clever bongeye kuvuga ko umutoza Haringingo Francis Christian yitwaye nabi mu gice cy’imikino ibanza ku buryo kuba yazatwara igikombe cya shampiyona biri kure nk’ukwezi.

Aba banyamakuru bavuze ko mu mezi atandatu asigaye ngo shampiyona irangire, Rayon Sports yakabaye yarirukanye Haringingo Francis ikamusimbuza Nshimiyimana Eric watoje Isonga FC, APR FC na AS Kigali.

Rayon Sports yasoje imikino ibanza ya shampiyona iri ku mwanya gatanu n’amanota 28. Ni inyuma ya AS Kigali ya mbere n’amanota 30, inganya na Kiyovu Sports ndetse na APR FC na Gasogi United zifite amanota 28 mu mikino 15 zakinnye.