Epaphrodite Nsengimana
Umukinnyi wa Rayon Sports WFC, Judith Atieno yaguye mu kibuga maze abura ubutabazi bwihuse mu mukino w’umunsi wa 16, wahuje iyi kipe n’Indahangarwa WFC.
Judith yakuruwe imisatsi na Kapiteni w’Indangamirwa, maze aguye akubita umutwe, abaganga bagerageza kumwitaho ariko biba iby’ubusa, bamushyira mu mbangukiragutabara.
Bashatse kumujyana ku bitaro maze umushoferi w’Imbangukiragutabara arabura, biba ngombwa ko hitabazwa umushoferi w’imodoka yazanye abakinnyi ba Rayon Sports aba ari we utwara umurwayi ku Bitaro.
Yagejejwe kwa muganga bamushyiraho ibyuma byongera umwuka agarura ubwenge. Nyuma y’umukino Ikipe yose yasanze Judith ku bitaro bya Rwinkwavu bamutegereza isaha n’igice, agaruye imbaraga bamuha ikipe ya Rayon Sports iramutahana. Ubu ari mu rugo aho ari gufata imiti.
Muri uyu mukino, warangiye Rayon Sports yatsinze uyu mukino ku gitego 1-0. Rayon Sports iracyayoboye urutonde rwa Shampiyona n’amanota 43 ikurikiwe na AS Kigali na 41.
