Social Mula
Umukinnyi wo hagati mu kibuga, Ishimwe Annicet yabwiye ubuyobozi bwa APR FC ko umutoza Mohammed Adil Erradi afite uruhare mu gutuma urwego rwe rw’imikinire rumanuka.
Mu minsi ishize umutoza Mohammed Adil Erradi yagize uruhare mu gufatira ibihano abakinnyi bane aribo Ishimwe Annicet, Byiringiro Lague, Nsengiyumva Ir’Shad na Nizeyimana Djuma.
Aba bakinnyi bari bahawe ibihano bitewe n’uko urwego rwabo rwari rwarasubiye inyuma, bakaba barahanwe biyongera kuri Nsanzimfura Keddy we ukiri mu bihano.
Mbere y’uko aba bakinnyi bahabwa imbabazi zo kugaruka mu ikipe nkuru babanje kugirana ibiganiro n’ubuyobozi bwa APR FC maze bose bemeza ko umutoza Mohammed Adil Erradi ababwira amagambo abakomeretsa.
Ubwo Ishimwe Annicet yahabwaga umwanya ngo asobanure icyatumye asubira inyuma yasubije ko umutoza Adil ajya amubwira amagambo akomeye bigatuma acika intege.
Uyu mukinnyi yakomeje ashimangira ko urwego rwe rw’imikinire rutasubiye inyuma n’ikimenyimenyi ababwira ko bakwiye gupima urwego rwe ku mikino ibiri yakiniye Ikipe y’Igihugu Amavubi y’Abatarengeje imyaka 23 ubwo bahuraga na Libya.
Iyi mikino yombi Ishimwe Annicet yayikinnye neza akaba ari nacyo cyatumye ubuyobozi bwa APR FC bubona ko umutoza Mohammed Adil ashobora kuba ari we utuma basubira inyuma kuko Annicet yageze mu Ikipe y’Igihugu agaragaza ko akiri umukinnyi ufite impano idashidikanywaho.
Ikipe ya APR FC ikomeje kwitegura umukino w’ikirarane cy’umunsi wa kabiri wa shampiyona y’Icyiciro cya Mbere aho ku wa Gatanu tariki 7 Ukwakira 2022 izacakirana na Bugesera FC.
