Social Mula
Myugariro wo hagati muri Rayon Sports, Ngendahimana Eric ayoboye itsinda ry’abakinnyi batishimiye imyitozo bakoreshwa na Nduwimana Pablo ushinzwe kongerera ingufu abakinnyi b’iyi kipe.
Kuva umwaka w’imikino wa 2022-2023 watangira, abakinnyi benshi b’ikipe ya Rayon Sports bakunda kuvunika, ibi akaba ari bimwe mu byo abasesenguzi b’umupira w’amaguru bashingiraho bavuga ko umutoza ushinzwe kongerera ingufu abakinnyi ashobora kuba abakoresha imyitozo itari iya kinyamwuga.
Mu cyumweru gishize ubwo abakinnyi ba Rayon Sports biteguraga umukino wa Kiyovu Sports, Ngendahimana Eric yari yabanje kwanga gukora imyitozo aho yabwiye umutoza Nduwimana Pablo ko imyitozo abakoresha nta kamaro yabagirira ahubwo ko ibavuna ku buryo bukomeye bigatuma bajya gukina imikino ya shampiyona barushye bikabatera imvune.
Amakuru YEGOB yamenye ni uko abakinnyi batandukanye b’ikipe ya Rayon Sports basigaye bajya mu myitozo batishimye kubera ko urwego rw’imitoreze ya Nduwimana Pablo bakomeje kurukemanga.
Rayon Sports iri ku mwanya wa kane n’amanota 33 mu mikino 18, bakaba bari kwitegura umukino w’ishiraniro bafitanye na APR FC ku Cyumweru tariki 12 Gashyantare 2023 kuri Stade Mpuzamahanga y’i Huye.
