Moïse Habanabashaka
Umugore wasanzwe yapfiriye ku nzira yasanzweho ibimenyetso bihishura icyo ashobora kuba yazize.
Ku mugoroba wo kuri iki cyumweru ahagana saa kumi n’imwe n’igice (17h30) abaturage basanze umurambo w’umugore ku muhanda, ariko ntihamenyekanye icyo yazize.
Byabereye mu karere ka Ruhango, mu murenge wa Byimana mu kagari ka Kirengere, mu mudugudu wa Rusororo.
Abaturage baganiriye n’UMUSEKE, dukesha iyi nkuru bavuga ko babonye umurambo w’umugore uri mu kigero cy’imyaka 50 y’amavuko ku muhanda.
Umunyamabanga Nshingwabikorwa w’umurenge wa Byimana, Mutabazi Patrick yabwiye UMUSEKE ko bishoboka ko uriya muntu yaba yazize impanuka y’imodoka.
Ati “Uko umurambo ugaragara birakekwa ko ari imodoka itaramenyekana yamugonze. Imyirondoro ye, ntabwo iramenyekana.”
Umurambo wa nyakwigendera wahise ujyanwa ku bitaro bya Kabgayi.
