HARAGIRIMANA Dieudonne
Minisiteri y’Ubuzima muri New Zealand n’izindi nzego zibishinzwe biri gukora iperereza ku mugabo uvugwaho kwikingiza inkingo za Covid-19 inshuro 10 ku munsi.
Ibitangazamakuru byo muri iki gihugu bivuga ko uyu mugabo [utatangarijwe amazina kubera ko agikorwaho iperereza] yaba yarishyuwe n’abadashaka kwikingiza kugira ngo abikore mu mazina yabo.
Ibi bitangazamakuru bivuga ko nyuma yo kwishyurwa, uyu mugabo yagiye ku mavuriro atandukanye, akabeshya ko ari uyu n’uyu, hanyuma agakingirwa.
Iki kibazo kimaze kumenyekana, Minisiteri y’Ubuzima yavuze ko gihangayikishije cyane. Naho uyoboye ikigo gishinzwe gahunda y’ikingira, Astrid Koornneef atangaza ati: “Turi gukurikirana cyane iki kibazo kandi turi gukorana n’inzego bireba mu kuyikurikirana.”
Astrid yavuze ko gufata izi nkingo byagira ingaruka ku wazihawe ndetse n’uwamwishyuye ngo yikingize mu izina rye. Ati: “Kwiyitirira umuntu, uhagabwa ubuvuzi ni bibi. Bishyira mu kaga umuntu wakiriye urukingo mu izina ry’undi hamwe n’uwo raporo igaragaza ko yikingije kandi bitabaye.”
Uyu mugabo yorohewe no kwikingiza izi nshuro zose ku munsi kubera ko muri New Zealand batabaza imyirondoro mu gihe umuntu yikingiza nk’uko igitangazamakuru cy’Abadege, DW kibivuga.</
