“Ubwo ni wowe mu Rayon ubona ko cyagiye.” Igisubizo cya Cassa Mbungo Andre utoza AS Kigali abajijwe niba yavuye ku gikombe cyasekeje benshi

Umutoza w’ikipe ya AS Kigali Cassa Mbungo Andre yasekeje abantu nyuma yo gusubiza umunyamakuru igisubizo gisekeje ubwo yari amubajije niba igikombe kigiye.

Ku munsi w’ejo hashize tariki ya 21 Ukuboza 2022, hakomezaga imikino ya Shampiyona y’umunsi wa 15, hakinwa imikino myinshi harimo n’umukino wahuje ikipe ya AS Kigali yatsinzwemo na Sunrise FC ibitego 2-1 abatuye Nyagatare babyina intsinzi.

Nyuma y’uyu mukino abatoza batanze ikiganiro n’itangazamakuru bavuga aho byapfitiye ndetse naho byakunze, gusa Cassa Mbungo Andre yasekeje abantu ubwo yavugaga ikipe ya Rayon Sports kandi bari bamubajije ku ikipe ye.

Yagize Ati”Tumaze imikino 5 tudatsindwa, rero uyu umunsi wari uwacu wo gutsindwa. Ubwo ni wowe mu Rayon ubona ko igikombe kigiye ariko niba uri umunyamupira urabona ko duhari, urebye amanota dufite aduha amahirwe yo kuba tukiri ku gikombe.”

Abantu bibajije byinshi kuri iki gisubize uyu mutoza w’ikipe ya AS Kigali yasubije umunyamakuru amwita ko ari umufana wa Rayon Sports, bavuga ko bitagakwiye ko umutoza asubiza muri ubu buryo.

Ikipe ya AS Kigali nyuma yo kwandagarizwa mu karere ka Nyagatare n’ikipe ya Sunrise FC, yagumye ku mwanya wa mbere w’agateganyo n’amanota 30 aho irusha ikipe ya Rayon Sports amanota 2 gusa mbere yo gukina n’ikipe ya Gasogi United kuri uyu wa gatanu.