Social Mula
Ikipe ya Etincelles FC ntabwo ikozwa ibyo kugurisha rutahizamu Sumaila Molo muri Rayon Sports bitewe n’uko iyi kipe idafite amafaranga yuzuye.
Hashize ibyumweru bikabakaba bitatu bivugwa ko ikipe ya Rayon Sports yamaze kumvikana na rutahizamu Mpuzamahanga ukomoka mu gihugu cya Ghana witwa Sumaila Molo.
Iyi kipe itozwa na Haringingo Francis Christian yari yiyemeje kugura amasezerano y’umwaka n’igice asigaranye muri Etincelles FC, iyi kipe ikaba yari kuzishyura miliyoni 25 z’Amanyarwanda.
Mu mpera z’icyumweru gishize ubuyobozi bwa Rayon Sports bwasabye ubuyobozi bwa Etincelles FC ko barekura Sumaila Molo akerekeza muri Gikundiro ikaba ibahaye igice cy’amafaranga bumvikanye andi ikazayabaha nyuma y’ibyumweru bibiri, ariko ubuyobozi bwa Etincelles bwabyamaganiye kure.
Birasa naho Sumaila Molo azasinyira AS Kigali kuko yo yiteguye guhita igura amasezerano ye, mu gihe Rayon Sports yo ku wa Gatatu tariki 4 Ukuboza 2023 izakoresha igeragezwa rutahizamu ukomoka muri Repubulika Iharanira Demokarasi ya Congo witwa Mindeke.
