Kubwayo Mc croix
Biratangajwe cyane kubona ikipe nka Manchester United ifite shampiyona 20 z’Ubwongereza Premier League kuri ubu ifite ubusatirizi bwatsinze igitego 1 cyonyine mu masaha 20 n’iminota 20 bumaze gukina muri Premier League kuva uyu mwaka w’imikino watangira.
Ubusatirizi bwa Manchester United bugizwe na Anthony Martial, Rasmus Højlund na Marcus Rashford bumaze gutsinda igitego 1 cyonyine kuva Premier League y’uyu mwaka yatangira. Iki gitego kimwe cyatsinzwe na Marcus Rashfors mu mikino 8 amaze gukina muri Premier League aho amaze gukina iminota 673, Rasmus Højlund we amaze gukina imikino 5 muri Premier League, yakinnye iminota 357 ntagitego na kimwe aratsinda, Anthony Martial we amaze gukina imikino 6 muri Premier League, yakinnye iminota 190 ntagitego na kimwe aratsinda.
Manchester United iragaruka mu kibuga kuri uyu wa gatandatu saa 21:00 z’ijoro aho irakirwa na Sheffield United. Manchester United iri ku mwanya wa 10 muri Premier League, mu mikino 8 yakinnye, yatsinzemo imikino 4, itsindwa imikino 4, yinjije ibitego 9, yinjizwa ibitego 12, ifite umwenda w’ibitego 3 n’amanota 12; umusaruro utishimirwa n’abafana b’iyi kipe itozwa na Erik Ten Hag.
